FÂ E DISFÀ - IL PIC
(prin lavôr dai arlêfs di classe cuarte de scuele primarie di Pucinie)
Il mês di Zenâr la mestre nus à puartât a scuele doi tocs di tronc di aiâr che a son stâts sbusâts di un pic. Noaltris ju vin cjalâts cun atenzion e o vin pensât di fâ une ricercje in internet. O si sin dividûts in grups e ogni grup al veve un lavôr di fâ.
Cualchidun al à cirût gnovis sul pic de corone: dulà che al vîf, ce che al mangje, cemût che al è fat…
Cualchidun al à cirût informazions su cemût che al fâs il nît…
Cualchidun altri al à provât a copiâ il nît e cualchidun altri ancjemò al à dissegnât il pic.
Cun dutis chestis informazions ogni frut e ogni frute al à preparât il sô lapbook dal pic…
Biel che o lavoravin, un frut al à tacât a bati cul penarel sul banc, cussì o vin vût la idee di inventâ un disleelenghe: IL RAP DAL PIC.
Lu vin scrit, lu vin provât un pocjis di voltis e daspò, cul tablet gnûf di pache, o vin regjistrât un video… ce faturis! O vin scugnût fâ e disfâ il video mil voltis: nol vignive mai avonde ben…
Cumò o sin su Youtube cul nestri video: ce sodisfazion!
IL ZÛC DAI COLÔRS – classe prime de Scuele Primarie di Pucinie
Chest al è un dai lavôrs dai fruts e da lis frutis di classe prime.
Lôr a àn zuiât cui colôrs par furlan, par talian e par inglês: a àn voltât par furlan une cjantute, a àn fat un lapbook, a àn inventât il zûc dai colôrs.
I colôrs, ducj i colôrs
Cu la lûs a saltin fûr
Nassin di trê…
Nassin dal ros, dal zâl e dal blu!
Ce colôr isal?
What colour is it?
Che colore è?
